1.வினைச் சொல் என்றால் என்ன? 

ஒரு செயலை அல்லது பொருளொன்றின் புடைப் பெயர்ச்சியை உணர்த்துஞ் சொல் வினைச் சொல் எனப்படும்.

2.வினைச் சொல்லின் சிறப்பியல்பு யாது? 

காலத்தைக் காட்டும். 

3.வினைச் சொல்லை எத்தனை வகைப்படுத்தலாம்? அவை எவை? 

இரண்டு வகைப்படுத்தலாம்.

அவையாவன:

முற்றுவினை 

எச்சவினை

4.முற்றுவினை என்றால் என்ன? 

ஒரு எழுவாயின் செயல் முற்றுப்பெற்று நிற்கும் வினை முற்றுவினை எனப்படும். 

உ+ம்  கண்ணன் பாடம் படித்தான்.

5.முற்றுவினை எத்தனை வகைப்படும்? அவை எவை?

இரண்டு வகைப்படும்.  அவையாவன: 

தெரிநிலை வினைமுற்று 

குறிப்பு வினைமுற்று 

6.தெரிநிலை வினைமுற்று என்றால் என்ன?

செய்பவன், கருவி, நிலம், செயல், காலம், செய்பொருள் எனும் அறுவகைப் பொருளையும் தந்து வெளிப்படையாகக் காலத்தைக் காட்டி நிற்கும் வினைமுற்று தெரிநிலை வினை முற்று எனப்படும். 

 உ+ம்  வனைந்தான். படித்தான். 

7. குறிப்பு வினைமுற்று என்றால் என்ன? 

அறுவகைப் பொருளடியாகப் பிறந்து செய்பவனை மாத்திரம் விளக்கி குறிப்பாகக் காலத்தைக் காட்டிநிற்கும் வினைமுற்று குறிப்புவினைமுற்று எனப்படும்.

(உ+ம்)    கரியன், நல்லன்.

8.எச்சவினை என்றால் என்ன? 

ஒரு எழுவாயின் செயல் முற்றுப் பெறாது நிற்கும் வினை எச்சவினை எனப்படும். 

(உ+ம்)    நடந்த, படித்த

9.எச்சவினை எத்தனை வகைப்படும்? அவை எவை?

இரண்டு வகைப்படும். அவையாவன

பெயரெச்சம்

வினையெச்சம் 

10.பெயரெச்சம் என்றால் என்ன?

பால்காட்டும் முற்று, விகுதி பெறாத குறைச் சொல்லாய் அமைந்து, பெயர்ச் சொல்லை முடிக்குஞ் சொல்லைக் கொண்ட எச்சம் பெயரெச்சம் எனப்படும். 

(உ+ம்) படித்த கண்ணன்.